近期香港政壇最熱門嘅話題，除咗煲呔曾同袋巾梁嘅特首選戰，就數到由政府鐵碗清拆天星鐘樓引發嘅集體回憶討論，連立法會都因此鬧出雙胞案。公民黨黨魁余若薇同自由黨議員方剛，喺同一日提出兩項同集體回憶有關嘅動議，搞到班議員集體記憶錯亂，同一篇稿剪剪貼貼講兩次又有，喺A動議講B議題，喺B動議講番A議題又有。

其實如果天星單嘢早幾個月發生，可能煲呔個表哥香灼璣都唔駛搞到咁狼狽，佢嗰間由貨廠改建而成觀音山香居大宅，雖然唔夠五十年歷史，但係就好有建築特色，又有咁多新界鄉紳、政界名人同報紙狗仔隊嘅集體回憶，加上香帥當時仲係古物古蹟諮詢委員會成員，大可自行提議將香居列為法定古蹟建築，逃過清拆命運。可惜單嘢太早爆出嚟，煲呔為免影響自己嘅選情，不但將自己做過沙田民政專員同造訪過香居嘅回憶叮走，仲大義滅親將香帥踢出新一屆古物諮詢委員會委任名單。

至於今屆立法會最值得懷念嘅集體回憶，好多同事都會揀政改方案投票，回憶吓到底邊個泛民議員轉咗軚又唔認、邊個想轉軚又轉唔到、邊個轉完軚又扭番正。不過我物議員就鍾情財委會主席選舉多啲，包括卿姐爆冷勝出之後，振臂高呼再繞場一周慶祝嗰個開心樣；負責抽籤嘅田少嗰個尷尬樣；唔知點解輸同輸畀邊個嘅陳鑑林嗰個錯愕樣；死都唔認自己係「二五仔」嘅石禮謙嗰個無辜樣；仲有事後大家集體回憶坐喺自己附近啲議員，尤其係自由黨同泛聯盟同事投咗乜嘢票嘅情景。

再將大家嘅回憶拉返去九六年首屆特首選舉，想當年我有幾個對九七回歸心大心細嘅朋友，都係因為位聽咗嗰位大姐用高八度嘅普通話，不斷咁唱出「董建華」三個字，先至下定決心執行李移民。所以當政制無事局局長林公公宣佈今屆特首選舉唔會以「唱票」方式點票，我物議員都有啲失落，覺得又少咗樣集體回憶。

不過講到最令香港人痛心嘅消失的回憶，始終都係《基本法》承諾嘅「一國兩制」、「港人治港」同「高度自治」，明明話咗五十年不變，點知過咗唔夠十年就畀人拆晒，唔夠秤列做古物古蹟。■